Eisithe ag Preasoifig an Rialtais
Inniu (Déardaoin, an 4 Iúil), i gCaisleán Bhaile Átha Cliath, reáchtálfar Cruinniú Iomlánach, le baill agus ionadaithe ó bheagnach 30 Eaglais, Pobal Creidimh agus Eagraíocht Neamhfhaoistiniúil difriúil.
Tá an Cruinniú Iomlánach seo eagraithe mar chuid de Phróiseas Idirphlé Struchtúrtha Eaglaise agus Stáit, a bunaíodh in 2005 agus arb ionann é agus cuid de thiomantas an Rialtais comhairliúchán fadréimseach agus uilechuimsitheach a dhéanamh ar bheartas poiblí.
Is é cruinniú an lae inniu an chéad uair ar chas an Taoiseach, san fhormáid seo, le raon chomh leathan d’eagraíochtaí creidimh agus neamhfhaoistiniúla. Cuirfear tús leis an imeacht le haitheasc tosaigh leis an Taoiseach, agus ina dhiaidh sin reáchtálfar plé a bheidh dírithe ar théamaí éagsúla lena n-áirítear: idirphlé struchtúrtha éifeachtach; pobail uilechuimsitheacha agus éagsúla; agus oideachas.
Is céim chomhairleach thábhachtach é an Cruinniú Iomlánach chun an caidreamh idir an Eaglais agus an Stát a fhorbairt. Is modh uilechuimsitheach agus trédhearcach é chun gach comhpháirtí idirphlé a thabhairt le chéile chun saincheisteanna a bhaineann leo beirt a phlé. Chomh maith leis sin, is léargas é ar an raon éagsúil pobal creidimh atá in Éirinn agus ar an ról tábhachtach atá acu inár sochaí.
Bhí an méid seo a leanas le rá ag an Taoiseach ag an imeacht:
Deich mí ó shin d’fháiltíomar roimh an bPápa Prionsias go hÉirinn. Le linn dom a bheith i mbun cainte sa seomra seo an t-am sin, mhol mé go raibh sé in am anois caidreamh nua a bhunú idir Reiligiún agus an Stát in Éirinn - cúnant nua don 21ú hAois. Aois nuair nach mbeidh reiligiún ag croílár ár Stáit, ach go mbeidh ról dáiríre agus fiúntach aige inár sochaí.
Is cuid den obair sin an t-idirphlé struchtúrtha seo agus tógann sé ar na cruinnithe a bhí agam leis an Eaglais Chaitliceach Rómhánach dhá bhliain ó shin, agus leis na hEaglaisí Protastúnacha anuraidh.
Creidim gurb é idirphlé oscailte, trédhearcach agus rialta an bealach is fearr chun an caidreamh nua sin a bhunú, caidreamh ina dtugtar aitheantas do na cosúlachtaí agus do na difríochtaí eadrainn.
Deireadh
Nótaí do na hEagarthóirí
Seoladh cuirí chuig raon leathan ionadaithe ó Eaglaisí, Pobail Chreidimh agus Eagraíochtaí Neamhfhaoistiniúla in Éirinn chun freastal ar Idirphlé Eaglaise Stáit an lae inniu. Seo a leanas na heagraíochtaí a ghlac leis an gcuireadh:
- Ionad Ioslamach Ahlul Bayt na hÉireann
- Cumann Moslamach Ahmadiyya na hÉireann
- Cumann Eaglaisí Baistigh in Éirinn
- Cumann Aindiachaithe na hÉireann
- Eaglais na hÉireann
- Comhairle Eaglaisí Bhaile Átha Cliath
- Cumann Éire Vedanta
- Comhaontas Soiscéalach na hÉireann
- Cumann Daonnachach na hÉireann
- Aontas Búdaithe na hÉireann
- Comhairle Éireannach na nEaglaisí
- Pobal Giúdaigh na hÉireann
- Ionad Ioslamach na hÉireann
- Ionad Cultúir Ioslamaigh na hÉireann
- Cumann Ioslamach na hÉireann
- Eaglais Liútarach in Éirinn
- Eaglais Mheitidisteach in Éirinn
- Tionól Spioradálta Náisiúnta Bahá’ís na hÉireann
- Eaglais Phreispitéireach in Éirinn
- Eaglais Chríostaí Slánaithe Dia
- Creideamh-Chumann na gCarad
- An Eaglais Chaitliceach Rómhánach in Éirinn
- Eaglais Ateachtach an tSeachtú Lá in Éirinn
- Pobal Suíceach in Éirinn
- Pobal Moslamach Sufi in Éirinn
- Eaglais Íosa Chríost Naoimh na Laethanta Deireanacha in Éirinn
- Eaglais Cheartchreidmheach na Rúise in Éirinn
- Ionad Cultúir Véideach Hiondúch na hÉireann